مـنتـديـــات جــروح الـعـراق
اهلا وسهلا زائرنا الكريم بين اسرتنا
ان لم تكن مسجل فنرجو تسجيلك معنى
مع تحيات ادارة المنتدى
مـنتـديـــات جــروح الـعـراق

مـنتـديـــات جــروح الـعـراق
 
الرئيسيةالرئيسية  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 انواع البواري وبعض المصارحات

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
نفسي اشكي همي
عضو جديد


mms
عدد المساهمات : 5
السٌّمعَة : 0
تاريخ التسجيل : 25/03/2011

مُساهمةموضوع: انواع البواري وبعض المصارحات    الجمعة مارس 25, 2011 4:21 am

طبعاً مثل ما تعرفون هنالك انواع عديدة من البوري وخصوصاً انه البنات هذه الايام قد تفننو في طك البيبسي للولد وخصوصاً في الجامعات والكليات. فبدون ان نسأل ليش انضربت بوري وليش طكوولي بيبسي لازم ع الكل يعرف شنو هو البوري تعريفه اسبابه وكيفية ملافاته ومن ثم التخلص من اثاره الجانبية. نجي نعرف البوري:
البوري: هو عملية رفض البنية للولد بأسلوب معين يتراوح من الاجابة بوقاحة والاستصغار الى اسلوب مؤدب مثل (انت مثل اخوية) واسباب البوري عديدة تتراوح من الغرور الى بيع الثقل. اما انواعها فمتعددة ايضاً وسنأتي ع شرحها لاحقاً.
انواع البوري: طبعاً انواع البوري متعددة ولذلك ارتأينا ان يكون تصنيفنا للبواري حسب الاسباب فقد يتشارك نوعان او اكثر من البوراي بنفس السبب فارتئى المؤلف واللي هو اني وحسب شوفتي للموضوع ان يكون لي تصنيف خاص للبواري وحسب التالي: طبعاً راح ننطي ارقام تدل ع قوة البوري وراح نصنفها من 10 انج الى 1 انج وكلما كان اقرب للعشرة كلما كانت قوته اعظم.

1. البوري الطاك: ويعني انو انت تحب بنية طاكة حيل (تتصور راح تباوع عليك هي) يعني هي طاكة حلوة كشاخة ام لسان (حتى لو جانت هادئة فهذا النوع عنده فد لسان) وسبب البوري هو انه ما عندك اي مجال تثير بيه اعجاب البنية يعني راح تجي تفيك عليها بسيارتك وموبايلك وهي يجيها السايق للباب لو راح تكشخ عليها وتحط ريحة وتفتر يمها وهي اخوها لابس هدوم البيت مال النوم اكشخ منك لو راح تفيك عليها بشعرك والجل مالتك وهي عيونها بس احلى من 100 شاب مثلك, ما عندك أي امل ولا حجازي نياااااااا ... لا الصدك اني اكلك لا تروح ولا تجي ولا تتعب نفسك هو بوري بوري لو ابو حمزة المصري يصير مغني. اما كيفية ملافاة هذا البوري فاني مراح اكلك انسى البنية .. لا بالعكس بس راح اكلك اول شي بيع ثقل ولاتبين نفسك هيج مذبوح عليها ودائماً تلحكها لأن راح تكرهك البنية بس تكدر تدبر رقم التلفون مالتها او ايميلها وتدزلها فد مسج او ايميل بمناسبة او بدون مناسبة وطبعاً شنو تستخدم فد رقم تلفون او ايميل محد يعرفه بس انت ويكون نص المسج (مساء الخير او صباح الخير .. قبل لا تكولين اي شي .. اني احب اكلج انو اني اسف ع الازعاج واني لي الشرف انو احجي وياج وافتخر بيج وانتي ع راسي بس والله مكدرت امنع نفسي انو ادزلج رسالة تحية او سلام ولو انتي مغرورة شوية وادري مراح تديرين بال للمسج او الايميل بس حقج لانه لو القمر محلو مجان صار هيج بالسما عالي وانتي احلى من القمر فحقج تتكبرين ع البشر) ان جاوبتك البنية فظل انفخ بيهة (يمعودة اني اصدك اجذب احجي وياج) (انتي ع راسي وانتي ارقى وحدة بالقسم) ولا تبين لها هويتك او شخصيتك الا تنطيك الامان هي (والله اني ما اكدر اكلج اني منو لأن اخاف عندج فكرة مسبقة عني ومراح تقبلين تحجين وياية واخسر حتى هذه المسجات او الايميلات البسيطة اللي بيناتنا) وشنو دير بالك تحشش وياها (هاي السوالف مال حسن : حسن عيشة , وليد : وليد انام نيااااااااااااا) دير بالك لان هذا النوع يموت ع الثقل. ولمن تنجح الخطة اتصل بية واني اكلك شتسوي وراها. ويتراوح هذا البوري من 9 الى 7 انج لأن اغلب الاحيان البنية تجاوب الولد بأحتقار وتنهد بيه خوش هدة. ويسمى بالبوري الطاك لان البنية طاكة حيل انفجار بالفلوس.

2. البوري المؤذي: وهذا ينتج بين ولد وبنية بيناتهم اكو تعارف (البوري هذا مال انت مثل اخوية) اكثر الاحيان يصير بالكروبات ليش لانه اكو جماعة من الشباب مثل المشايف بس عرفله وحدة من كروب معين اجى ثاني يوم اريد اخطب اريد اتزوج وهي البنية اصلاً محاسة بيه ولا حاسة بوجوده ليش يكون مؤذي لان الولد اكثر الاحيان يتعلق بالبنية ولكونه مشايف فراح يعيش وياه هذا البوري طول العمر ويأثر مستقبلاً ع علاقاته وية النسوان (لان البنية ضربته بوري وتحججت بانه انت مثل اخوية واني ما افكر بهيج شي وورة كم يوم راحت كبلت ووافقت على غيره) فراح تكون له فد نظرة ع النسوان انو كلهم كذابات ومخادعات بس الحقيقة هي لا مخادعة ولا كذابة البنية بس هي محاسة بوجودك يعني اذا انت خاتل وما ادري شلون تصرفاتك وتتوقع انو اول مراح تروحلها راح تاخذك بحضنها وتوكعلك دك بووس. بابا لازم تسوي كدامها فد موقف رجولة وشهامة مو تجي حفلة الجامعة وتكعد دك ركص كدامها لا بابا لا. اريدك تكعد تخلق الصدف شلون, لازم تكعد تتابع البنية ووكت مثلاً مراح تروح للاستنساخ اللي بالجامعة وخصوصاً اذا اكو ازدحام فصير انت قبلها هناك وع اساس صدفة واخذ الاستنساخ من ايدها وكوللها (روحي للقسم وانتظريني هناك) واذا كالت هي (لا انتظرك هنا) انت جاوب (لا مو هنا ازدحام واخاف واحد يتحارش او يتصرف تصرف محلو واني ما اتحمل) فراح يخلص الاستنساخ وتروح توديه واذا رادت تتحاسب وياك كوللها (مو عيب شنو مو رجال اني بعينج لو شنو) فأكعد اخلق الصدف والفرص من هيج نوع ونفس الشي مثلاً الكافتريا او المطعم أول مراح تشوفها تريد تشتري شي واكو ازدحام رأساً روح عليها وكوللها شتريدين اجيبلج وخليها ترجع لمكانها اللي جانت كاعدة بيه يعني بين قوسين انت اخلق الفرص والصدف طبعاً وتتصرف بهيج مواقف برجولة وشهامة بحيث تثير اعجاب البنية وفي اغلب الاحيان هي راح تكوم تحبك قبل ما تحبها انت ومرات تنهار البنية وتروح لصديقتها وتكللها اني احبه لفلان واللي هو انت وبذلك اتلافيت البوري وعاشو عيشة سعيدة واذا نجحت الخطة فأبقى ع هذا المنوال. يتراوح حجم هذا البوري من 8 الى 5 انج (ممكن ان يكون مؤذي وممكن ان يكون خفيف الاذى وحسب شخصية الولد وقدرة تحمله).

البوري الناقص: هذا البوري مشكلة .. يعني انت تشوف بنية دتضحكلك وتنطيك مجال فأنت تتوقع اي هذا هو هسة راح اروح اصارحهة وراح تقبل وراح اعيش ملك .. عمو انت غلطان ليش لأنه هي مدتضحكلك ودتباوع عليك بس انت والسبب انو هي البنية سبورت ودتباوع ع 100 واحد غيرك وانو شخصيتها للبنية هيج فلا تحاول تروحلها وشكد مدتشوفها تضحكلك فهي ترة كذابة واذا رحتلها فراح تخليك ع الشحن مراح تكلك اني اسفة لا بالعكس راح تشلع قلبك ومراح تنطيك حجاية لا اي ولا لا, واذا بيك انت صرت مجرد شخص آخر في لائحتها الطويلة للمضروبين بوري من عدها وثاني يوم راح تروح هاي البنية وتحجي لكل البنات شلون انت رحتلها وشكتلها بالضبط وشلون هي ضربتك بوري فحتى بالمستقبل من راح تروح ع غيرها بالقسم راح تكلك انت مو رحت ع فلانة اللي هي هاي اللي دنحجي عليها هسة, اصلاً راح تفضحك فضيحة وحتى البنات اللي تعرفهم انت من شعبتك راح يجوون عليك ويكولولك (بشرفك تروح على هاي شلون رحتلها, ما تعرفها لهاي شنو, مخلت احد بالقسم اذا محجتله شلون ضربتك بوري) يعني انت راح تصير سينما واحتمال جبير تتحول الى نصبة اذا مو جماعتك سووك ميز تك رجل وديركصون عليه اثنين ليش لان اغلب الاحيان تكون هذه البنية اللي تضرب هيج بوري مو بنية طاكة ولا بنية تستاهل, دائماً تكون مشعشعة ومدري شلونها .. ليش يسموه البوري الناقص لأن هاي البنية سوت دكة ناقصة بيك .. اما كيفية ملافاة هذا البوري فهي وبكل بساطة التفييك .. شلون هسة اكلك .. بس النقطة هنا لازم تعرف هاي البنية على شنو عينها يعني هاي البنية تحب الولد الطاك تحبه حلو لازم تحاول تعرف من يا جانب تباوع ع الولد هي فاذا هي تدور ماديات فانت من ثاني يوم بناطير واحذية رسمية ومحبس وقلادة ذهب وتحط سويج السيارة بحيث تبين المدالية مال جهاز الحماية بس, بس المدالية طالعة من الجيب مو تلزم السويج وتفر بيه كدامها عبالك ابو كية وطبعاً شنو هذا كله بثقل علمود هي تقتنع انو انت ابن لوردات حتى الذهب حاول تكعد قريب عليها وتراويهياه يعني تفتح دكمة القميص وتدنج كدامها تنزع المحبس ع اساس دتفرك اصابيعك بس اذا هي تدور ولد حليوة فبعد هاي مشكلتك لان لازم انت تكون حليوة وتبدي تعتني بنفسك وهكذا تستمر الى ان تصير البنية قافلة عليك بحيث ما تكوم تشوف غيرك عاد انت من توصل لهيج مرحلة تبدي تندك بيها يعني من تشوفها يم براد المي كوللها بلكت الكلاص اريد اشرب مي او من تصير كدامك بفد ممر والممر ضيق شوية فكللها صباح الخير وامشي عدل يعني بس هاي الحجاية واطلع كبل ولا تندار حاول فد مرة مرتين خلال الاسبوع تسوي مثل هيج شغلات وشوف ردة فعلها فاغلب الاحيان البنية تكون سبورت وراح تتجاوب وياك الى ان يجي الاسبوع الثاني فروحلهة وعلية الشغلة وصدك ابد مراح تضربك بوري. يتراوح حجم هذا البوري من 7 الى 4 انج ويكون غير مؤذي اذا انت ولد وكح وشعار اما اذا انت فقير فلا والله تصير نصبة من ورة هذا البوري بالقسم.

البوري المدعبل: هذا هم مشكلة ليش لانه هذا يحدث بسبب انو الولد شاف بنية حتى لو من غير قسم وداسلها ثاني يوم راح ادعبل عليها يريد يصارحهة (ومنا جائت التسمية مال البوري المدعبل) يعني انت صير بمكان البنية هي دتمشي ع حب الله ورأساً واحد مجعمر يوكفها يريد يحجي وياها ويكلها اني اخطب واتزوج وهي لا شايفة الولد ولا تعرفه يعني لو انت بمكانها شراح تجاوب ... اكيد النتيجة بوري طبعاً وينتج هذا البوري طبعاً نتيجة عربنة الولد من قبل اصدقائه (اللي ناصبين عليه) اللي قشمروه وكالوله لك يلة روحلهة دشوفها بقت وحدها علمودك لك يلة .. مو هيج الحجي يابا. اغلب البنات اللي تضرب هذا البوري هم خوش بنات وما عدهم زايدة ناقصة بس المشكلة انو هاي البنية فقط ما تعرفك .. شلون تتفاداه لهذا البوري اني اكلك .. اول شي روح اسأل عليها مرتبطة لو لا, اذا مرتبطة فأنسى لان هاي البنية دتعيش قصة حب (هيج بنات حلوات ومؤدبات سوكهن ماشي اسرع من غيرهم وبسرعة البرق تكبل وترتبط) اذا لا فشد حيلك لان اكو كومة شغل ويمكن ترسب من وراها هاي السنة لأن اكو فد 10 ولد بنفس الوقت ديركضون عليها نفس ركضك, ثاني شي تروح تسأل او تراقب منو من معارفك او من اصدقاء معارفك يعرف هاي البنية فرضاً خلي نكول صديقة الكبل مال صاحبك (حتى لو جان صاحبك اللي بغير قسم ومهما يكون بعيد عليك وعلاقتكم مو قوية) فخلي نكول هاي البنية اللي هي المشروع مالتك وياها هاي الصديقة اللي حجينا عنها بالخط, المهم تروح على صاحبك وتحجيله السالفة هسة يكلك اوكي وشبيدي اني شسويلك فأنت كله ما رايد شي بس عرفني على هاي البنية اللي وياها بالخط المهم تتعرف ع اي شخص ممكن يوصل حجيك لها ورة مراح تتعرف على هذا الشخص او الشخصة اللي يعرف هاي البنية سواء ان كانو زملاء او اصدقاء او بالخط سوى او اي شي بس بيناتهم تعارف وتلفي عليه تلطشلك بيه انت لهذا الشخص او الشخصة فد اسبوع اسبوعين بس مو تشلغم عليه بحيث يكرهك وتحجيلة الموضوع وتكله اريد اخطب واني جاد بالموضوع وخليه هو يتكتك شلون يكوللها للبنية اللي انت رايدها انو اكو واحد يريد يخطبها واغلب الاحيان صديقك راح يستعين بصاحبته لانجاز المهمة والله كريم. طبعاً اذا تلافيت هذا البوري ونجحت الخطة فراح تتحول الحالة الى قصة حب مدمرة وهي هاي احلى شغلة ممكن يصادفها الانسان بحياتة واللي هي انو يعيش قصة حب. حجم هذا البوري من 5 الى 3 انج ويكون غير مؤذي لان لا البنية تعرف الولد ولا الولد يعرف البنية.

طبعاً احتوى الموضوع ع تكتيكات في مجال المصارحة مجربة وشغالة 100 المية.
012
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
مايسترو البصره
صاحب الموقع
صاحب الموقع
avatar

عدد المساهمات : 260
السٌّمعَة : 0
تاريخ التسجيل : 17/11/2010
العمر : 25
الموقع : الاردن _ عمان

مُساهمةموضوع: رد: انواع البواري وبعض المصارحات    السبت مارس 26, 2011 10:02 am

ههههههه

صراحه جم بوري مضروب

تقبل مروري

ــــــــــــــــــــــــــــــــــ التوقيع ـــــــــــــــــــــــــــــــــــــــــــ
[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
انواع البواري وبعض المصارحات
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مـنتـديـــات جــروح الـعـراق :: منتديات ترفيهيه :: نكت وحزازير جديده-
انتقل الى: